ಕಣ್ಣಿಗೆ ಅರಿವಾಗದ್ದು ಕರುಳಿಗೆ ಅರಿವಾಗಿ ಕೂಗುವ ಕರುಳಿನ ಕರೆ 1970 (ಅಣ್ಣಾವ್ರ ಚಿತ್ರ ೧೧೭/೨೦೭)

ಶ್ರೀ ಇದೊಂದು ಬಹಳ ತುಂಬು ಹೃದಯದ ಚಿತ್ರಕಥೆ.. ನಮ್ಮ ಪುಟ್ಟಣ್ಣ ಕಣಗಾಲ್ ಇದ್ದಾರಲ್ಲ ಪುಟ್ಟಣ್ಣ ಕಣಗಾಲ್.. ಅವರು ಪುಟ್ಟಣ್ಣ ಅಲ್ಲ ದೊಡ್ಡಣ್ಣ.. ಚಿತ್ರಕಥೆಯನ್ನು ರಜತ ಪರದೆಯಲ್ಲಿ ತೋರಿಸುವುದರಲ್ಲಿ ಎತ್ತಿದ ಕೈ. 

ಅವರ ಜೊತೆ ಮೊದಲು ಚಿತ್ರ ಮಾಡುವ ಸೌಭಾಗ್ಯ ಸಿಕ್ಕಿದ್ದು ಮಲ್ಲಮ್ಮನ ಪವಾಡ ಚಿತ್ರದಲ್ಲಿ.. ಆ ನೆರಳು ಬೆಳಕಿನ ಜೊತೆಯಲ್ಲಿ ಚಿತ್ರವನ್ನು ಮೂಡಿಸಿದ ರೀತಿ ಅದ್ಭುತವಾಗಿತ್ತು... 

ಈ ಚಿತ್ರವೂ ಹಾಗೆ.. ಪ್ರತಿಯೊಂದು ದೃಶ್ಯವನ್ನು ಕಲೆಗಾರ ಕುಂಚದಿಂದ ಚಿತ್ರವನ್ನು ಸಿಂಗರಿಸಿದಂತೆ ಪ್ರತಿ ದೃಶ್ಯವನ್ನು ಕಾವ್ಯವಾಗಿ ಮಾಡಿದ್ದಾರೆ.. ಹಾಸ್ಯ, ಅನುಕಂಪ, ಕ್ರೌರ್ಯ, ದ್ವೇಷ, ಕಿಲಾಡಿತನ ಎಲ್ಲವನ್ನೂ ಚಿತ್ರಕತೆಯಲ್ಲಿ ಅಳವಡಿಸಿ ಒಂದು ಅಮರ ಚಿತ್ರವನ್ನಾಗಿ ಮಾಡಿದ್ದಾರೆ. 

ಪುಟ್ಟಣ್ಣ ಅವರ ಕಲೆಗಾರಿಕೆ ಅದ್ಭುತವಾಗಿದೆ. 

ನನ್ನ ಪಾತ್ರ ಪೋಷಣೆಗೆ ಹೆಚ್ಚಿನ ಅವಕಾಶ ನೀಡಿದ್ದಾರೆ.. ಅಂದರೆ ನನ್ನ ಹಾವಭಾವ, ಹಾಸ್ಯವನ್ನು ನಿಭಾಯಿಸೋದು, ಹೊಡೆದಾಟ, ಹಾಡುಗಾರಿಕೆ, ನೃತ್ಯ ಪ್ರತಿಯೊಂದು ಅವರ ಮನದಲ್ಲಿ ಇದ್ದ ಹಾಗೆ ಮೂಡಿಬರಲು ನನಗೆ ಸಹಕಾರ ನೀಡಿದ್ದಾರೆ 

ಇಲ್ಲಿ ಮುಖ್ಯಪಾತ್ರ ನಾನು ಅನ್ನೋದಕ್ಕಿಂತ ಭೀಷ್ಮ ನಾಗೇಂದ್ರರಾಯರು ಮುಖ್ಯವಾಗಿದ್ದಾರೆ. ಅವರ ನೆರಳಿನಲ್ಲಿ ನಾವೆಲ್ಲಾ ಅಭಿನಯಿಸಿದ್ದೇವೆ ಅಂತ ಎದೆ ತಟ್ಟಿ ಹೇಳಬಹುದು. 

ಲಾರಿ ಚಾಲಕನಾಗಿ ನನಗೆ ಇರಬೇಕಾದ ಕೆಲವು ಹಾವಭಾವಗಳನ್ನು ಹೇಳಿಕೊಟ್ಟರು.. ಕಲ್ಪನಾ ಪಾತ್ರಧಾರಿಯ ಜೊತೆ ಹಾಸ್ಯ, ಛೇಡಿಸುವ ಮಾತುಗಳು .. ಚೆನ್ನಾಗಿ ಮೂಡಿ ಬಂದಿದೆ.. 

ನಾವೆಲ್ಲ ಒಂದು ತೂಕವಾದರೆ.. ನಾಗೇಂದ್ರರಾಯರ ಅಭಿನಯ, ಅವರ ಪಾತ್ರವೇ ಇನ್ನೊಂದು ತೂಕ.. ನಮ್ಮನ್ನು ತೂಗಿಸಿಕೊಂಡು ಹೋಗಿದ್ದಾರೆ ರಾಯರು.. 

ಇದೆ ನನ್ನ ಆಶ್ರಮ, ಇದೆ ನನ್ನ ಕಾಯಕದ ನೆಲೆ ಎಂದು ಹೇಳುವ ಸಂಭಾಷಣೆ ಇಷ್ಟವಾಗುತ್ತದೆ.. ಮನೆ 

ಈ ಎಂಟಾಣಿ ಎಂಟು ಲಕ್ಷ ರೂಪಾಯಿ ಬರುವ ಹಾಗೆ ಆಗಲಿ ಎನ್ನುವಾಗ ಅವರ ಧ್ವನಿ .. ಸೂಪರ್.. 

ಅಂತ್ಯದಲ್ಲಿ ಎಲ್ಲಾ ಗೋಜಲುಗಳನ್ನು ಪರಿಹರಿಸುವ ಆ ಪಾತ್ರವೇ ಚಿತ್ರದ ಹೈಲೈಟ್. 

ಪೋಷಕ ಪಾತ್ರದಲ್ಲಿ ಇವರು ಮತ್ತು ಅಶ್ವಥ್ ಯಾವಾಗಲೂ ದೈತ್ಯರು. 

ಹೌದು ಖಳ ಇರಲೇಬೇಕಲ್ಲ ಚಿತ್ರದಲ್ಲಿ.. ನನ್ನ ಬಹುಪಾಲು ಚಿತ್ರದ ಖಳನಟ ದಿನೇಶ್ ಮತ್ತೊಮ್ಮೆ ಇಲ್ಲಿದ್ದಾರೆ.  ಅವರ ಧ್ವನಿ, ಏರಿಳಿತ ಎಲ್ಲವನ್ನೂ ಅಚ್ಚುಕಟ್ಟಾಗಿ ನಿಭಾಯಿಸಲು ನಿರ್ದೇಶಕ ಪುಟ್ಟಣ್ಣನವರ ಪ್ರತಿಭೆ ಇಲ್ಲಿ ಅನಾವರಣಗೊಂಡಿದೆ.

ತಾಯಿ ಹೃದಯ.. ಮಿಡಿಯುವ ಮನಸ್ಸು.. ಆದವಾನಿ ಲಕ್ಷ್ಮೀದೇವಿ ಅಕ್ಷರಶಃ ತಾಯಿಯಾಗಿದ್ದಾರೆ. 

ತಂದೆಯ ವಿರುದ್ಧ ಸಿಡಿದು ಬೀಳುವ ಮಗನಾಗಿ, ಒಪ್ಪಿಕೊಂಡ ಹುಡುಗಿಗೆ ಪ್ರೇಮಿಯಾಗಿ, ಗೌರವ ಕೊಡುವ ಭಾವಿ ಅಳಿಯನಾಗಿ ಸುದರ್ಶನ್  ಒಪ್ಪವಾಗಿ ಪಾತ್ರವಾಗಿದ್ದಾರೆ. 

ಕಲ್ಪನಾ ಈ ತಾಯಿ ಯಾವುದೇ ಪಾತ್ರವಾದರೂ ಸಲೀಸಾಗಿ ಹರಿಯುವ ಅದ್ಭುತ ಕಲಾವಿದೆ. ಹಳ್ಳಿಯ ಸೊಗಡಿನ ಪಾತ್ರದಲ್ಲಿ ಕಳ್ಳೇ ಕಾಯಿ ಕಳ್ಳೇ ಕಾಯಿ ಹಾಡು.. ಆ ಹಣ್ಣು, ಪುರಿ ಮಾರುವ ತಳ್ಳುಗಾಡಿಯ  ವ್ಯಾಪಾರಿಯ ಗುಣವನ್ನು ಪರದೆಯ ಮೇಲೆ ಸಾಕ್ಷಾತ್ಕರಿಸಿದ್ದಾರೆ. "ಏ ಲಾರಿ" ಅನ್ನುವಾಗ ಮುಗ್ಧತನ, "ಪರಮೇಶಿ" ಅನ್ನುವಾಗ ತೋರುವ ಪ್ರೀತಿ .. ಅವರಿಗೆ ಅವರೇ ಸಾಟಿ.. 

ಉಳಿದ ಪಾತ್ರಗಳು ಚಿತ್ರಕತೆಯನ್ನು ಮುಂದುವರೆಸಿಕೊಂಡು ಹೋಗುವಲ್ಲಿ ಯಶಸ್ವಿಯಾಗಿದ್ದಾರೆ. 

ಸುಂದರಕೃಷ್ಣ ಅರಸ್, ರತ್ನಾಕರ್, ಬೆಂಗಳೂರು ನಾಗೇಶ್ ಮತ್ತು ಸಹಕಲಾವಿದರ ಹಾಸ್ಯ, ಬೇಜವಾಬ್ಧಾರಿತನ, ಮೂರ್ಖತನ ಪ್ರತಿಯೊಂದನ್ನು ಹಾಸ್ಯಮಯವಾಗಿ ನಿರೂಪಿಸಿದ್ದಾರೆ. ಹೆಣ್ಣಿನ ಸ್ವಯಂವರದ ದೃಶ್ಯ ಚಿತ್ರದ ಪ್ರಮುಖ ಹಾಸ್ಯ ದೃಶ್ಯದಲ್ಲಿ ಒಂದು. ಎಚ್ ರಾಮಚಂದ್ರಶಾಸ್ತ್ರಿ ಅವರ ಹೆಣ್ಣಿನ ತಂದೆಯಾಗಿ ಸಿಡಿದು ಬೀಳುವ ಪರಿ ಸೊಗಸಾಗಿದೆ. 

ಕಥೆ, ಚಿತ್ರಕತೆ ಮಾಡಿ ನಿರ್ದೇಶಿಸಿದ್ದು ನನ್ನ ನೆಚ್ಚಿನ ಪುಟ್ಟಣ್ಣ ಕಣಗಾಲ್. 

ಸಂಗೀತ ಅವರ ಆಪ್ತ ಎಂ ರಂಗರಾವ್ 

ಹಾಡುಗಳನ್ನು ಆರ್ ಎನ್ ಜಯಗೋಪಾಲ್ ರಚಿಸಿದ್ದಾರೆ. 

ಪಿ ಬಿ ಶ್ರೀನಿವಾಸ್, ಎಲ್ ಆರ್ ಈಶ್ವರಿ, ಬಿ ಕೆ ಸುಮಿತ್ರಾ  ಮತ್ತು  ಎಸ್ ಜಾನಕೀ ಹಾಡಿದ್ದಾರೆ ಜೊತೆಗೆ ಆ ಆ ಈ ಈ ಕನ್ನಡ ಅಕ್ಷರಮಾಲೆ ಹಾಡಿನಲ್ಲಿ ಆರ್ ಎನ್ ಜಯಗೋಪಾಲ್ ದನಿಗೂಡಿಸಿದ್ದಾರೆ 

ಶ್ರೀಕಾಂತ್ ಕುಮಾರ್ ಛಾಯಾಗ್ರಹಣದ ಜವಾಬ್ಧಾರಿವಹಿಸಿಕೊಂಡಿದ್ದಾರೆ

ಶ್ರೀಕಾಂತ್ ಅಂಡ್ ಶ್ರೀಕಾಂತ್ ಎಂಟರ್ಪ್ರೈಸಸ್ ಲಾಂಛನದಲ್ಲಿ ಶ್ರೀಕಾಂತ್ ನಹತಾ ಹಾಗೂ ಶ್ರೀಕಾಂತ್ ಪಟೇಲ್ ನಿರ್ಮಿಸಿದ್ದಾರೆ 

ಶ್ರೀ ನಿನಗೆ ಗೊತ್ತು ಆದರೂ.. ಪುಟ್ಟಣ್ಣ ಕಣಗಾಲ್ ಚಿತ್ರಗಳಲ್ಲಿ ನಾಡು ನುಡಿಯ ಬಗ್ಗೆ ಬಹಳ ಅಭಿಮಾನ ಬರುವ ಹಾಡುಗಳು ಸದಾ ಚಿತ್ರಿಸಿರುತ್ತಾರೆ.. ಇದು ಚಿತ್ರಕತೆಯ ಓಘಕ್ಕೆ ಭಂಗ ಬರದಂತೆ ಮತ್ತು ಅದು ಕಥೆಯನ್ನು ಮುಂದುವರೆಸುವ ಎಳೆಯಾಗಿ ಮೂಡಿ ಬರೋದು ವಿಶೇಷತೆ 

ಮೈಸೂರು ದಸರಾ ಎಷ್ಟೊಂದು ಸುಂದರ .. ದಸರಾ ಹಬ್ಬವನ್ನು ಪೂರ್ಣವಾಗಿ ತೋರಿಸಿದ್ದಾರೆ. 

ಆ ಆ ಈ ಈ ಕನ್ನಡ ಅಕ್ಷರಮಾಲೆ .. ಮಕ್ಕಳಿಗೆ ಅಕ್ಷರಮಾಲೆ ಸಲೀಸಾಗಿ ಬರುವಂತೆ ಪ್ರತಿ ಅಕ್ಷರಕ್ಕೂ ಒಂದೊಂದು ಬಂಧ ಕಲ್ಪಿಸಿ ಚಿತ್ರಿಸಿದ್ದಾರೆ. 

ಕಂಡೆ ನಾ ಕಂಡೆ ತಾಯಿ ಮಮತೆಯ ಸವಿಯನ್ನು ಅನುಭವಿಸಿದ ಪಾತ್ರ ಹಾಡಿಕೊಂಡು ಹೋಗುತ್ತದೆ

 ತಾಜಾ ತಾಜಾ ಕಳ್ಳೆ ಕಾಯಿ.. ಕಡಲೆ ಕಾಯಿಯ ಮಹತ್ವವನ್ನು ವಿವರಿಸುತ್ತಲೇ ಬೆಂಗಳೂರಿನ ಪ್ರಮುಖ ತಾಣಗಳನ್ನು ತೋರಿಸುತ್ತಾರೆ

ಹೊಡೆಯುವ ಕೈಯೊಂದು ಕಣ್ಣೊರೆಸುವ ಕೈಯೊಂದು ಕೊಲ್ಲುವವ ಒಬ್ಬನಾದರೆ ಕಾಯುವವ ಇನ್ನೊಬ್ಬ ಎನ್ನುವ ಸಂದೇಶವನ್ನು ವಿವರಿಸುತ್ತದೆ 

ನನ್ನವರಿಗೆ ಯಾರು ಸಾಟಿಯೇ ಇಬ್ಬರು ಪ್ರೇಮಿಗಳು ತನ್ನವನೇ ಶ್ರೇಷ್ಠ ಎಂದು ತೋರುವ ಸ್ಪರ್ಧೆಯ ಹಾಡು.. 

ನನಗೆ ಇದು ಪುಟ್ಟಣ್ಣ ಕಣಗಾಲ್ ಜೊತೆಯಲ್ಲಿ ಎರಡನೇ ಸಿನಿಮಾ.. ಒಂದು ಅದ್ಭುತ ಅಭಿನಯ ನೀಡಲು ಅವಕಾಶ ಮಾಡಿಕೊಟ್ಟಿದ್ದಾರೆ 

ರಾಜಕುಮಾರ್ ಸರ್.. ಎಷ್ಟು ಸುಂದರವಾಗಿ ಚಿತ್ರದ ಬಗ್ಗೆ ವಿವರಿಸಿದ್ದೀರಾ.. ಜೊತೆಗೆ ಚಿತ್ರದ ವಿಶೇಷತೆ, ಹಾಡುಗಳ ವೈಶಿಷ್ಟತೆ, ಪಾತ್ರಗಳ ಪರಿಚಯ.. ಪ್ರತಿಯೊಂದು ಸೊಗಸಾಗಿದೆ.. 

ನಿಮ್ಮ ಪಾತ್ರದ ಬಗ್ಗೆ.. 

ಆರಂಭದ ದೃಶ್ಯದಲ್ಲಿ ಕೂಲಿಂಗ್ ಗ್ಲಾಸ್, ಜಾಕೆಟ್ ನಲ್ಲಿ ಲಾರಿಯಿಂದ ಇಳಿಯುವ ದೃಶ್ಯ. .. 

ಕಳ್ಳೇಕಾಯಿ ಎಂದು ಕಲ್ಪನಾ ಪಾತ್ರವನ್ನು ರೇಗಿಸುವುದು, 

ಅಪ್ಪಾಜಿ ಅಪ್ಪಾಜಿ ಎಂದು ನಾಗೇಂದ್ರರಾಯರನ್ನು ಗೌರವಿಸುವುದು... 

ಆದವಾನಿ ಲಕ್ಷ್ಮೀದೇವಿಯವರಲ್ಲಿ ತಮ್ಮ ತಾಯಿ ಪ್ರೇಮವನ್ನು ಕಾಣುವ ದೃಶ್ಯಗಳು 

ದಿನೇಶ್ ಅವರ ಜೊತೆಯಲ್ಲಿನ ದೃಶ್ಯಗಳು 

ನೀನು ತುಂಬಾ ಚೆನ್ನಾಗಿದಾ, ನೀನು ತುಂಬಾ ಮುದ್ದಾಗಿದಾ ಎಂದು ದಿನೇಶ್ ಅವರ ಗೆಳತಿಯನ್ನು ಛೇಡಿಸುವುದು.. 

ಮೈಸೂರು ದಸರಾ ಹಾಡಿನಲ್ಲಿ ನಿಮ್ಮ ನೃತ್ಯ

ಸುದರ್ಶನ್ ಅವರ ಜೊತೆಯಲ್ಲಿ ಮೋಹನಪ್ಪಾ, ಮೋಹನಪ್ಪಾ ನನ್ನ ತಂಗಿಯನ್ನು ನೀವು ಕಣ್ಣಲ್ಲಿ ಕಣ್ಣಿಟ್ಟು ಕಾಪಾಡುತ್ತೀರಾ ಎಂದು ತೋರುವ ಅಭಿಮಾನ.. 

ಅಂತಿಮ ದೃಶ್ಯದ ಹೊಡೆದಾಟದ ದೃಶ್ಯಗಳು 

ನಿಮ್ಮನ್ನು ನೀವು ಈ ಪಾತ್ರದಲ್ಲಿ ತೊಡಗಿಸಿಕೊಂಡಿರುವ ರೀತಿ ಅದ್ಭುತ ಸರ್.. 

ಏನಪ್ಪಾ ಇದು ಸಣ್ಣ ಮಾತಿನಲ್ಲಿ ಈ ಪಾಟಿ ಹೇಳುತ್ತಿದ್ದೀಯ ನಿನಗೆ ಮಂಗಳವಾಗಲಿ ಶ್ರೀ 

ರಾಜಕುಮಾರ್ ಸರ್ ನಿಮ್ಮ ಅಭಿಮಾನಕ್ಕೆ ಧನ್ಯೋಸ್ಮಿ.. ಮತ್ತೊಂದು ನಿಮ್ಮ ಚಿತ್ರರತ್ನದ ಜೊತೆ ಸಿಗುವೆ.. 

ಶುಭವಾಗಲಿ ಶ್ರೀ.. ಹನ್ನೆರಡು ಮತ್ತು ಇಪ್ಪತ್ತನಾಲ್ಕು ದಿನಾಂಕಕ್ಕೆ ಮತ್ತೆ ಸಿಗುತ್ತೇನೆ.. !

 

ಕಣ್ಣ ಮುಂದೆ ಬಂದ ಇತಿಹಾಸದ ಪ್ರಸಿದ್ಧ ಪುರುಷ ಶ್ರೀ ಕೃಷ್ಣದೇವರಾಯ 1970 (ಅಣ್ಣಾವ್ರ ಚಿತ್ರ ೧೧೬/೨೦೭)

ಕೆಲವನ್ನು ನಾವು ಆರಿಸಿಕೊಂಡು ಹೋಗುತ್ತೇವೆ.. 
ಕೆಲವು ನಮ್ಮನ್ನು ಆರಿಸಿಕೊಂಡು ಬರುತ್ತವೆ.. 

ರಾಜಕುಮಾರ್ ಒಂದು ಸಂದರ್ಶನದಲ್ಲಿ ಹೇಳಿದ ಮಾತು..  ... 
ರಾಜಕುಮಾರ್ ಅವರ ಚಿತ್ರಜೀವನದಲ್ಲಿ ಅಕ್ಷರಶಃ ಈ ಮಾತು ನಿಜ...

ದಕ್ಷಿಣ ಭಾರತವನ್ನು ಶ್ರೀಮಂತಗೊಳಿಸಿದ ಮೇರು ವ್ಯಕ್ತಿಗಳಲ್ಲಿ ಶ್ರೀ ಕೃಷ್ಣದೇವರಾಯರು ಒಬ್ಬರು.. ಇವರಿದ್ದ ಕಾಲಘಟ್ಟದಲ್ಲಿ ಶ್ರೀಮಂತಿಕೆ ಬರಿ ಸಂಪತ್ತಿನ ವಿಚಾರದಲ್ಲಿ ಮಾತ್ರವಲ್ಲದೆ ಶಿಲ್ಪಕಲೆ, ಆಡಳಿತದ ವೈಖರಿ, ಸಾಮಾಜಿಕ ಸುಧಾರಣೆಗಳು, ನಾಡ ಹಬ್ಬಗಳು, ಸಂಗೀತ, ಸಾಹಿತ್ಯ, ಸೇನೆ ಹೀಗೆ ಎಲ್ಲಾ ಪ್ರಾಕಾರಗಳಲ್ಲಿಯೂ ಈ ಕಾಲ ಸುವರ್ಣಯುಗವಾಗಿತ್ತು ಅಂತ ಇತಿಹಾಸಕಾರರು ಹೇಳುತ್ತಾರೆ. 

ನಮ್ಮ ಅದೃಷ್ಟವೆಂದರೆ, ಆ ಕಾಲಘಟ್ಟಕ್ಕೆ ನಮ್ಮ ಗಡಿಯಾರವನ್ನು ತಿರುಗಿಸಿಕೊಂಡು ಹೋಗಲು ಸಾಧ್ಯವಿಲ್ಲ.. ಆದರೆ ಈ ಕಾಲಘಟ್ಟವನ್ನೇ ನಮ್ಮ ಕಣ್ಣುಗಳ ಮುಂದೆ ತಂದು ನಿಲ್ಲಿಸುವ ಶಕ್ತಿ ಪದ್ಮಿನಿ ಪಿಕ್ಚರ್ಸ್ ಲಾಂಛನದಲ್ಲಿ ಚಿತ್ರಕತೆ, ನಿರ್ಮಾಣ, ಮತ್ತು ನಿರ್ದೇಶನದ ಹೊಣೆ ಹೊತ್ತಿದ್ದ ಬಿ ಆರ್ ಪಂತುಲು ಮತ್ತು ತಂಡದವರಿಗಿತ್ತು.

ಅರಂಭದಲ್ಲಿ ಸಂಬಂಧ ಪಟ್ಟ ಮಹನೀಯರಿಗೆ ಕೃತಜ್ಞತೆ ಸಲ್ಲಿಸುವುದು.. ಚಿತ್ರದ ಇತಿಹಾಸ ಪುರುಷನ ಬಗ್ಗೆ ಒಂದು ಸಣ್ಣ ಪರಿಚಯ.. ಹೀಗೆ ಶುರುವಾಗುವ ಸಿನಿಮಾ ಸಿನಿ ರಸಿಕರನ್ನು ಹಿಡಿದಿಡಲು ಸಹಾಯ ಮಾಡಿತು

ಆ ಮಹಾನ್ ಕಥಾನಾಯಕನನ್ನು ರಾಜಕುಮಾರ್ ಎಂಬ ಶ್ರೀಕೃಷ್ಣದೇವರಾಯನ ಪಡಿಯಚ್ಚಿನಂತೆ ಇರುವ ...ಅಲ್ಲ ಅಲ್ಲ ಶ್ರೀಕೃಷ್ಣದೇವರಾಯರೇ ಧರೆಗಿಳಿದು ಬಂದರೂ, ಅವರೇ ಅಚ್ಚರಿ ಪಡುವಂತೆ ಪಾತ್ರದೊಳಗೆ ಹೊಕ್ಕಿದ್ದ ರಾಜಕುಮಾರ್ ಅವರನ್ನು ತೆರೆಯ ಮೇಲೆ ತಂದದ್ದು ಅವರ ಅದ್ಭುತ ಪ್ರತಿಭೆಗೆ ಸಾಕ್ಷಿಯಾಗಿತ್ತು.. 

ನಾವ್ಯಾರು ಆ ಮಹಾನ್ಅ ಕಥಾನಾಯಕನ್ನು ನೋಡಿಲ್ಲ ಅಂತ ಸುಳ್ಳು ಹೇಳುವ ಬದಲು.. ಶ್ರೀಕೃಷ್ಣದೇವರಾಯರನ್ನು ನಾವು ತೆರೆಯ ಮೇಲೆ ನೋಡಿದ್ದೇವೆ ಅಂತ ಎದೆ ತಟ್ಟಿಕೊಂಡು ಹೇಳಬಹುದು.. 

ಶ್ರೀಕೃಷ್ಣದೇವರಾಯನಾಗಿ - ರಾಜಕುಮಾರ್ , ಮತ್ತು ತಿಮ್ಮರಸು ಅವರಾಗಿ ಬಿ ಆರ್ ಪಂತುಲು.. ಉಳಿದ ಪಾತ್ರಗಳಲ್ಲಿ ನರಸಿಂಹರಾಜು, ಭಾರತಿ, ಜಯಂತಿ, ದಿನೇಶ್, ಹನುಮಂತಚಾರ್, ಆರ್ ನಾಗೇಂದ್ರರಾವ್, ನರಸಿಂಹರಾಜು, ಆರ್ ಎನ್ ಸುದರ್ಶನ್, ಎಂ ವಿ ರಾಜಮ್ಮ, ಮೈನಾವತಿ, ಚಿಂದೋಡಿ ಲೀಲಾ, ಜಯ ಶನಿಮಹಾದೇವಪ್ಪ, ಜೋಕರ್ ಶ್ಯಾಮ್ ಉಳಿದ ಕೆಲವು ಮುಖ್ಯ ಪಾತ್ರಗಳಲ್ಲಿದ್ದಾರೆ. 

ಈ ಚಿತ್ರ ವಿಶೇಷ ಅನಿಸೋದು ಎರಡು ಕಾರಣಗಳಿಗೆ.. ಶ್ರೀ ಕೃಷ್ಣದೇವರಾಯ ಎಂದರೆ  ರಾಜಕುಮಾರ್, ರಾಜಕುಮಾರ್ ಎಂದರೆ ಶ್ರೀ ಕೃಷ್ಣದೇವರಾಯ ಎನ್ನುವಷ್ಟು ಕರಾರುವಾಕ್ ಪಾತ್ರ ಮೂಡಿಬಂದಿದೆ. 

ಎರಡು ಇತಿಹಾಸವನ್ನು ಹತ್ತಿರದಿಂದ ತೋರಿಸಿರುವ ಹಾಗೂ ಹೊರಾಂಗಣ ಒಳಾಂಗಣ, ಯುದ್ಧದ ಸನ್ನಿವೇಶಗಳು, ರಾಜದರ್ಬಾರ್, ಹಾಸ್ಯ ದೃಶ್ಯಗಳು, ಹಾಡುಗಳು, ಸಂಗೀತ ಎಲ್ಲವೂ ಒಂದಕ್ಕೊಂದು ಮಿಳಿತಗೊಂಡಿದೆ. 

ಒಂದು ಚಿತ್ರರತ್ನವಾಗಿ ನಮ್ಮ ಮುಂದೆ ನಿಂತಿರುವ ಈ ಚಿತ್ರವನ್ನು ನೋಡದಿರುವ ಚಲನಚಿತ್ರ ರಸಿಕರಿಲ್ಲ ಎನ್ನುವಷ್ಟು ಪ್ರಸಿದ್ಧಿ ಪಡೆದಿದೆ.. 

ಆ ರಾಜಗಾಂಭೀರ್ಯ ನೆಡೆ ನುಡಿ ಹಾವ ಭಾವ ರಣಕ್ಕೆ ಇಳಿದಾಗ ಮೂಡುವ ರೋಷಾವೇಶ, ಹಾಗೆಯೇ ಅರಮನೆಯಲ್ಲಿ ತನ್ನ ಪರಿವಾರದೊಂದಿಗೆ ಇರುವಾಗ ತೋರುವ ಯಜಮಾನತನ, ರಾಜಸಭೆಯಲ್ಲಿ ತೋರುವ ಗೌರವ, ಅದೇ ತನ್ನ ರಾಜ್ಯದ ಪಂಡಿತರಿಗೆ ಅವಮಾನ ಮಾಡಲು ಸಂಚು ಮಾಡಿಕೊಂಡು ಬಂದವರನ್ನು ನಿಭಾಯಿಸುವ ಕಲೆ..ಮಂತ್ರಿಗಳೊಂದಿಗೆ ಚರ್ಚಿಸುವಾಗ ತೋರುವ ರಾಜಕೀಯ ಮುತ್ಸದ್ದಿತನ ಎಲ್ಲವೂ ಶ್ರೀ ಕೃಷ್ಣದೇವರಾಯ ಅವರ ಆತ್ಮವೇ ಒಳ ಹೊಕ್ಕಿದಿಯೆನೋ ಎನ್ನುವಷ್ಟು ಕರಾರುವಾಕ್ಕಾಗಿ ನಿಭಾಯಿಸಿರುವ ಪಾತ್ರದ ಯಶಸ್ಸು ರಾಜಕುಮಾರ್ ಅವರಿಗೆ ಸಲ್ಲಬೇಕು.. 

ಈ ಪಾತ್ರವನ್ನು ಅಷ್ಟೇ ಗಟ್ಟಿಯಾಗಿ ನಿರೂಪಿಸಿ ನಿರ್ದೇಶನ ಮಾಡಿರುವುದು ಅಲ್ಲದೆ, ಶ್ರೀಕೃಷ್ಣದೇವರಾಯ ಅವರ ವಿಜಯನಗರ ಸಾಮ್ರಾಜ್ಯ ಉತ್ತುಂಗ ತಲುಪಲು ನೇರವಾದ ಇನ್ನೊಂದು ಬಲಾಢ್ಯ ಹೆಸರು ಮಂತ್ರಿ ತಿಮ್ಮರಸು ಅವರ ಪಾತ್ರ ಪೋಷಣೆಯಲ್ಲಿ ಬಿ ಆರ್ ಪಂತುಲು ಸೊಗಸಾಗಿ ಗೆದ್ದಿದ್ದಾರೆ. 

ಇಡೀ ಚಿತ್ರ ಇವರೆಡು ಪಾತ್ರಗಳ ಸುತ್ತಲೇ ಸುತ್ತುತ್ತದೆ ಎಂದರೆ ಅಚ್ಚರಿಯಿಲ್ಲ.. ನಿಜ ಇಡೀ ಚಿತ್ರವನ್ನು ತಮ್ಮ ಹೆಗಲ ಮೇಲೆ ಹೊತ್ತು ಗೆದ್ದಿರುವುದು ಹೆಮ್ಮೆಯ ಮಾತು

ಮಾತೃಹೃದಯಿಯಾಗಿ ಎಂ ವಿ ರಾಜಮ್ಮ ಅವರದ್ದು ಮರೆಯಲಾರದ ಅಭಿನಯ.. 

ಜಯಂತಿ ಮತ್ತು ಭಾರತಿ ಪಾತ್ರೋಚಿತ್ರ ಅಭಿನಯ 

ನರಸಿಂಹರಾಜು ತೆನಾಲಿ ರಾಮಕೃಷ್ಣನ ಕೆಲವು ಬುದ್ಧಿವಂತಿಕೆಯ ದೃಶ್ಯಗಳಲ್ಲಿ ಜೀವ ತುಂಬಿದ್ದಾರೆ ಅವರ ಪತ್ನಿಯಾಗಿ ಮೈನಾವತಿ.. ಅವರ ತಂದೆಯಾಗಿ ಎಚ್ ಆರ್ ರಾಮಚಂದ್ರಶಾಸ್ತ್ರಿ ಇದ್ದಾರೆ. 

ಪಂತುಲು ಅವರ ಆಸ್ಥಾನ ಸಂಗೀತ ಗಾರುಡಿಗ ಟಿ ಜಿ ಲಿಂಗಪ್ಪ ಸಂಗೀತದ ಮಾಧುರ್ಯದಿಂದ ಮಿಂಚಿದ್ದಾರೆ 

ಸಾಹಿತ್ಯಕ್ಕೆ ಕಣಗಾಲ್ ಪ್ರಭಾಕರ್ ಶಾಸ್ತ್ರೀ ಮತ್ತು ಆರ್ ಎನ್ ಜಯಗೋಪಾಲ್ ಅವರದ್ದು 

ಛಾಯಾಗ್ರಹಣ ಉಸ್ತುವಾರಿ ಎ ಷಣ್ಮುಗಂ ಅವರದ್ದು 

ಈ ರೀತಿಯ ಇತಿಹಾಸವನ್ನು ಮರುಸೃಷ್ಟಿ ಮಾಡುವ ಚಿತ್ರಗಳು ಆರಂಭ ಎಷ್ಟು ಕ್ರೂರತೆಯಿಂದ ಕೂಡಿ ನಂತರ ಅದರ ಉಚ್ಛ್ರಾಯ ಸ್ಥಿತಿ ತಲುಪಿ ನಂತರ ಮತ್ತೆ ಧಾರುಣವಾಗಿ ಅಂತ್ಯಗೊಳ್ಳುತ್ತದೆ. ಅಂತ್ಯ ಜೀರ್ಣಿಸಿಕೊಳ್ಳಲು ಆಗೋಲ್ಲ ಆದರೆ ಅದನ್ನು ಹೇಳದಿದ್ದರೆ ಪೂರ್ತಿ ಇತಿಹಾಸ ಹೇಳಿದಂತಾಗದು.. 

ಅದನ್ನೇ ಸೂಕ್ಷ್ಮವಾಗಿ ನಿರ್ದೇಶಕರು ಅಂತಿಮ ದೃಶ್ಯಗಳಲ್ಲಿ ಹೇಳಿದ್ದಾರೆ.. 

ಇದೊಂದು ಚಿತ್ರವಲ್ಲ. ಐತಿಹಾಸಿಕ ಚಿತ್ರ.. ಅದರಲ್ಲೂ ಪ್ರವರ್ಧಮಾನಕ್ಕೆ ಬಂದು ಕನ್ನಡ ಚಿತ್ರರಂಗವನ್ನು ಗಟ್ಟಿಯಾಗಿ ಬೇರೂರಲು ಕಾರಣೀಕರ್ತರಾದ ಹಲವು ಮಹನೀಯರ ಹೆಸರಲ್ಲಿ ರಾಜಕುಮಾರ್ ಅವರದ್ದು ಇರುವುದು ಮತ್ತು ರಾಜಕುಮಾರ್ ಚಿತ್ರಜೀವನದ ಮೊಟ್ಟಮೊದಲ ವರ್ಣ ಚಿತ್ರವೂ ಹೌದು. !