ಕುಟುಂಬದ ಹುಚ್ಚಿಡಿಸುವ ಸಮಸ್ಯೆಯನ್ನು ಹುಚ್ಚು ಹಿಡಿಸಿಕೊಂಡು ಬಿಡಿಸಿಕೊಳ್ಳುವ ಮದುವೆ ಮಾಡಿ ನೋಡು 1965 (ಅಣ್ಣಾವ್ರ ಚಿತ್ರ ೬೭/೨೦೭)

ಸುಮಾರು ಐವತ್ತು ನಿಮಿಷಗಳಾದ ಮೇಲೆ ತೆರೆಯ ಮೇಲೆ ಬರುವ ನಾಯಕ - ರಾಜಕುಮಾರ್ 

ನಾಯಕಿಯ ಹಿತಮಿತವಾದ ದೃಶ್ಯಗಳುಗೊಳೋ ಎಂದು ಅಳಬಹುದಾದ ದೃಶ್ಯಗಳ ಅನೇಕ ಸಾಧ್ಯತೆಗಳಿದ್ದರೂ  ಅದು ಇಲ್ಲ  - ಲೀಲಾವತಿ  

ಹಾಸ್ಯ ನಟರ ಗುಂಪು ಇದೆ ಆದರೆ ಹಾಸ್ಯ ಉಕ್ಕಿಸುವಷ್ಟು ದೃಶ್ಯಗಳಿಲ್ಲ - ದ್ವಾರಕೀಶ್, ರತ್ನಾಕರ್, ಗಣಪತಿ ಭಟ್, ನರಸಿಂಹರಾಜು

ಆ ಹೊತ್ತಿನ ಸಿನೆಮಾಗಳಲ್ಲಿ ಖಳ ಪಾತ್ರಗಳಿಗೆ ಹೆಸರಾದ ನಟರಿದ್ದರೂ ಆ ರೀತಿಯ ದೃಶ್ಯಗಳಿಲ್ಲ - ಉದಯಕುಮಾರ್ 

ಸಂಯಮ ನಟನೆಗೆ ಹೆಸರಾಗಿದ್ದ ನಟ ಕಟುವಾಗಿ ಮಾತಾಡುವ ದೃಶ್ಯಗಳಿದ್ದರೂ ಕೋಪ ತರಿಸುವಷ್ಟು ಕ್ಷುದ್ರತೆ ಇಲ್ಲ - ಆರ್ ನಾಗೇಂದ್ರರಾವ್ 

ಸ್ವಲ್ಪ ವಿಚಿತ್ರ ಆಂಗೀಕ ಅಭಿನಯ ತೋರುವ ಪೋಷಕ ನಟ ಇಡೀ ಚಿತ್ರದಲ್ಲಿ ಹರಡಿಕೊಂಡು ಚಿತ್ರಕ್ಕೆ ಅಗತ್ಯವಿರುವ ತಿರುವುದು ನೀಡುತ್ತಾರೆ - ಅಶ್ವಥ್ 

ತಾಯಿ ಪಾತ್ರದಲ್ಲಿ ಯಾವಾಗಲೂ ಅಮೋಘ ಅಭಿನಯ ನೀಡುವ ನಟಿ ಇಲ್ಲೂ ಕೂಡ ಸಮಯಮದ ಅಭಿನಯ - ಜಯಶ್ರೀ 

ಚಿತ್ರದ ಮೊದಲ ಅರ್ಧದಲ್ಲಿ ಚಟ್ ಪಟಾ ಮಾತಾಡುವ ಬಾಲ ಕಲಾವಿದ - ಮಾಸ್ಟರ್ ಬಸವರಾಜು 

ಸಣ್ಣ ಪಾತ್ರವಾದರೂ ಸುಮಾರು ದೃಶ್ಯಗಳಲ್ಲಿ ಎರಡೇ ಎರಡೇ ಸಾಲುಗಳು ಹೇಳುವ ಪಾತ್ರ - ರಮಾ  

ಘಟವಾಣಿ ಪಾತ್ರದಲ್ಲಿ ಯಾವಾಗಲೂ ವಿಜೃಂಭಿಸುವ ಪಾತ್ರ ತಾನು ಇರುವ  ದೃಶ್ಯಗಳನ್ನು ಅಲುಗಾಡಿಸಿವರು - ರಮಾದೇವಿ 

ಚುರುಕು ಸಂಭಾಷಣೆ ಮತ್ತುಗೀತೆಗಳು ಜೊತೆಯಲ್ಲಿ ನಿರ್ದೇಶನ - ಹುಣಸೂರ್ ಕೃಷ್ಣಮೂರ್ತಿ 

ಚಿತ್ರಕತೆ ಕೊಟ್ಟಿರುವ ಸಹ ನಿರ್ಮಾಪಕರಲ್ಲಿ ಒಬ್ಬರು - ನಾಗಿರೆಡ್ಡಿ 

ಉತ್ತಮ ಸಂಸ್ಥೆಯಿಂದ ಮೂಡಿ ಬಂದ ಚಿತ್ರ - ವಿಜಯ ಪ್ರೊಡಕ್ಷನ್ಸ್ 

ನಿರ್ಮಾಪಕರ ಜೋಡಿ - ನಾಗಿರೆಡ್ಡಿ ಚಕ್ರಪಾಣಿ 

ನಿಜ..  ವರದಕ್ಷಿಣೆ ಒಂದು ಸದಾ ಕಾಡುವ ಸಾಮಾಜಿಕ ಪಿಡುಗು.. ತನ್ನ ಅಕ್ಕನನ್ನು ಮದುವೆ ಮಾಡಿ ಕಳಿಸಿದ ಮೇಲೆ ತಾನು ಮದುವೆ ಆಗೋದು ಎಂಬ ತತ್ವ ಹೊಂದಿದ್ದ ತಮ್ಮ ಮನೆಯಲ್ಲಿನ ಒತ್ತಡದಿಂದ ಅಕ್ಕನಿಗೆ ವರ ಹುಡುಕಲು ಹೊರಡುವ ಈತ ಪರಿಸ್ಥಿತಿಯಿಂದ ಒತ್ತಡದಿಂದ ತನ್ನ ಮದುವೆಯಾಗಿ ನಂತರ ಅಕ್ಕನ ಮದುವೆಗೆ ದಾರಿ ಸಿಗುತ್ತದೆ.. 

ಆದರೆ ವರದಕ್ಷಿಣೆಯ ಭೂತ ಕಾಡಿ.. ಮದುವೆಯಾದರೂ ಗಂಡ ಹೆಂಡತಿ ಬೇರೆಯಾಗುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ.. ಅನೇಕಾನೇಕ ಒತ್ತಡಗಳ ನಡುವೆ ಸಿನಿಮಾದ ಅಂತ್ಯದಲ್ಲಿ ವರನ ಅಪ್ಪ ತನ್ನ ತಪ್ಪನ್ನು ತಿದ್ದಿಕೊಂಡು ಮತ್ತೆ ಎಲ್ಲರೂ ಒಂದಾಗುತ್ತಾರೆ. 

ತಡವಾಗಿ ಬಂದರೂ ಬಂದ ಮೇಲೆ ಜಾದೂ ಅಭಿನಯ ನೀಡುವ ರಾಜಕುಮಾರ್.. ಅದರಲ್ಲೂ ತಂದೆಯನ್ನು ಎದುರಿಸಿ ನಿಲ್ಲಬೇಕು ಎನ್ನುವಾಗ ತೋರುವ ಅಭಿನಯ.. ಹುಚ್ಚನಂತೆ ಮಾತಾಡುತ್ತಾ, ಹುಚ್ಚನ ಹಾಗೆ ಅಭಿನಯಿಸುವುದು.. ಮತ್ತೆ ಚಿತ್ರದ ಅಂತ್ಯದಲ್ಲಿ ರೌದ್ರಾವತಾರ ತೋರುವ ಅಭಿನಯ ಸೊಗಸು. 

ನಾಯಕಿಯ ಪಾತ್ರದಲ್ಲಿ ಲೀಲಾವತಿ ಶುಶ್ರೂಷೆ ಮಾಡುವ ದಾದಿಯಾಗಿ ಮನಸೆಳೆಯುತ್ತಾರೆ. 

ಅಶ್ವಥ್ ಒಂದು ರೀತಿಯ ಭಿನ್ನ ಅಭಿನಯ.. ತನ್ನ ಸ್ಥಿತಿ ಸರಿಯಿಲ್ಲದಿದ್ದರೂ ಇತರರ ಸಮಸ್ಯೆಗಳನ್ನು ನೇರಮಾಡುವ .. ಜೊತೆಗೆ ಒಂದು ರೀತಿಯಲ್ಲಿ ದೇಹ, ಕೈಗಳು, ಭುಜ ತಲೆಯನ್ನು ಅಲಗಾಡಿಸುತ್ತಾ ಶೈಲಿ  ಇಷ್ಟವಾಗುತ್ತದೆ 

ಈ ಚಿತ್ರದ ಆತ್ಮ ಆರ್ ನಾಗೇಂದ್ರ ರಾವ್.. ಪುರಾಣದ ಕಥೆಗಳನ್ನೂ ಹೇಳುತ್ತಿದ್ದರೂ, ದುರಾಸೆ, ದೂರಾಲೋಚನೆ.. ಮಗನ ಭವಿಷ್ಯವನ್ನು ಭದ್ರ ಪಡಿಸುವಲ್ಲಿ ತಮ್ಮ ಶ್ರಮಪಡುವ ಪಾತ್ರ.. ಮತ್ತೆ ಚಿತ್ರದ ಅನಾಟ್ಯದಲ್ಲಿ ತಮ್ಮ ತಪ್ಪು ಅಂತ ಗೊತ್ತಿದ್ದರೂ ಅದನ್ನು ತಮ್ಮ ಅಹಂನಿಂದ ಮುಚ್ಚಿಕೊಂಡು ಮಗನ ಭವಿಷ್ಯದ ಬಗ್ಗೆ ಮಾತಾಡುತ್ತಾ.. ಗೋಳಾಡುವ ಪಾತ್ರದಲ್ಲಿ ಶಕ್ತಿಯುತ ಅಭಿನಯ ನೀಡಿದ್ದಾರೆ. 

ಒಟ್ಟಿನಲ್ಲಿ ಇದೊಂದು ಸಾಮಾಜಿಕ ಚಿತ್ರ.. ಸಾಮಾನ್ಯವಾಗಿ ಪೌರಾಣಿಕ ಚಿತ್ರಗಳನ್ನು ಚಿತ್ರಿಸುವಲ್ಲಿ ಸಿದ್ಧಹಸ್ತರಾಗಿರುವ ಹುಣಸೂರ್ ಕೃಷ್ಣಮೂರ್ತಿ ಅವರ ಉತ್ತಮ  ಚಿತ್ರಗಳಲ್ಲಿ ಇದು ಒಂದು!