ಪರೋಪಕಾರಿ ಪಾಪಣ್ಣ ಎಂಬ ಗಾದೆಯಂತೆ ನಾಯಕ - ಪರೋಪಕಾರಿ 1970 (ಅಣ್ಣಾವ್ರ ಚಿತ್ರ ೧೨೬/೨೦೭)

ಒಂದರ ಹಿಂದೆ ಒಂದು ಚಿತ್ರ.. ಒಂದಕ್ಕಿಂತ ಒಂದು ಭಿನ್ನ.. ಎಲ್ಲದರಲ್ಲೂ ಸಾಮಾನ್ಯ ಸಂಗತಿ ಎಂದರೆ ರಾಜಕುಮಾರ್ ಅವರ ಲೀಲಾಜಾಲ ಅಭಿನಯ.. ನೀರು ಒಂದು ಪಾತ್ರೆಯಿಂದ ಇನ್ನೊಂದು ಪಾತ್ರೆಗೆ ಹಾಕಿದಾಗ ಆ ಪಾತ್ರೆಯಾಕಾರ ತೆಗೆದುಕೊಳ್ಳುವಂತೆ.. ಪ್ರತಿ ಚಿತ್ರದಲ್ಲೂ ಆ ಕಥಾವಸ್ತುವಿಗೆ ತಕ್ಕಂತೆ ಆ ಪಾತ್ರವೇ ಆಗಿಬಿಡುವುದು ರಾಜಕುಮಾರ್ ಅವರಿಗೆ ಸಲೀಸಾಗಿ ಹೋಗಿದೆ. 

ಹೌದು ಇಲ್ಲಿ ಸಿರಿವಂತರ ಮಗನಾದರೂ ದರ್ಪವಿಲ್ಲ. ಅಹಂಕಾರವಿಲ್ಲ.. ಬಡವರನ್ನು ನಿಕೃಷ್ಟವಾಗಿ ಕಾಣುವ ಗುಣವಿಲ್ಲ ಬದಲಿಗೆ ತನ್ನ ಸುತ್ತಲ ಬಡಬಗ್ಗರನ್ನು ಕಂಡು ಮರುಗುವಂಥಹ ಹೃದಯವಂತ.

 

ಮಾತಿಗೆ ಮಾತು ಬಂದು, ತನ್ನ ಸ್ವಾಭಿಮಾನಕ್ಕೆ ಪೆಟ್ಟು ಬೀಳುವಂಥಹ ಮಾತು ಕೇಳಿಬಂದಾಗ ಅದನ್ನೇ ಸವಾಲಾಗಿ ತೆಗೆದುಕೊಂಡು ಆ ಸವಾಲಿನಲ್ಲಿ ಗೆಲ್ಲುವ ನಾಯಕ ನಮ್ಮ ರಾಜಕುಮಾರ್. ಅವರ ಪಾತ್ರಾಭಿನಯವೋ, ಅವರೇ ಆ ಪಾತ್ರವೋ, ಆ ಪಾತ್ರದೊಳಗೆ ಪರಕಾಯ ಪ್ರವೇಶ ಮಾಡಿದ್ದಾರೆ ಅನ್ನುವಂತಹ ಅದ್ಭುತವಾಗಿದ್ದಾರೆ. 

ಸಿನಿಮಾದುದ್ದಕ್ಕೂ ನೀರಿನಂತೆ ಪ್ರವಹಿಸುತ್ತಲೇ ಇರುವ ಅವರ ಅಭಿನಯ ಕಂಡು ಮೂಕವಿಸ್ಮಿತನಾಗುವುದೇ ಉಳಿದಿರುವುದು. ಕಥೆ ತಂದೊಡ್ಡುವ ಸವಾಲುಗಳಲ್ಲಿ ಕೂಡ ಸಮರಸ ಚಿತ್ತದಿಂದ ಸಾಗುವುದು.. ನಾಯಕಿಯ ಜೊತೆಯಲ್ಲಿ ತಮಾಷೆ, ಕೀಟಲೆ, ಪ್ರೀತಿ, ಮಮತೆ, ತನ್ನ ಗುರು ಹಿರಿಯರನ್ನು, ತಂದೆಯನ್ನು, ಸಹೋದರನನ್ನು ಎಲ್ಲರನ್ನೂ ಪ್ರೀತಿಯಿಂದ ಕಾಣುವುದು.. ಹೀಗೆ ಹತ್ತಾರು ಸನ್ನಿವೇಶಗಳಲ್ಲಿ ಅವರ ಅಭಿನಯದ ಪ್ರತಿಭೆ ಹೊರಹೊಮ್ಮಿದೆ. 

ಈ ಚಿತ್ರವನ್ನು ಅನೇಕ ಅವರ ಚಿತ್ರಗಳಂತೆ ತನ್ನ ಹೆಗಲ ಮೇಲೆ ಹೊತ್ತು ನಿಭಾಯಿಸಿದ್ದಾರೆ. 

ನಾಯಕಿಯಾಗಿ ಜಯಂತಿ ಕಂಗೊಳಿಸುತ್ತಾರೆ. ಅವರ ಮುದ್ದು ಮುದ್ದಾದ ಕನ್ನಡ ರಾಜಕುಮಾರ್ ಪಾತ್ರಧಾರಿಯನ್ನು ಹೋಗೋ ಬಾರೋ ಎಂದು ಮಾತಾಡುವುದು, ಪ್ರೀತಿಯಿಂದ ಮಾತಾಡುವುದು, ಅಷ್ಟೇ ಜಾಣತನದಿಂದಲೂ ಇರುವುದು.. ಹೀಗೆ ನಾಯಕನ ಜೊತೆಯಲ್ಲಿ ಪ್ರತಿಯೊಂದು ಸನ್ನಿವೇಶದಲ್ಲೂ ಜಯಂತಿ ಕಂಗೊಳಿಸುತ್ತಾರೆ. 

ಅಪ್ಪನಾಗಿ ಸಂಪತ್ ಭಾವಾಭಿನಯಕ್ಕೆ ಹೆಸರುವಾಸಿ.. ಅದನ್ನು ಇಲ್ಲಿ ಮತ್ತೊಮ್ಮೆ ಸಾಬೀತು ಮಾಡಿದ್ದಾರೆ. ಸಿಂಹದ ಹೊಟ್ಟೆಯಲ್ಲಿ ಸಿಂಹವೇ ಹುಟ್ಟೋದು ಕಣೋ ಅನ್ನುವಾಗ ಅವರ ಮುಖಾಭಿನಯ, ಅದೇ ರೀತಿ ಮಗ ಮನೆ ಬಿಟ್ಟು ಹೋಗುವಾಗ ಕಣ್ಣೀರಾಗುವುದು. ಸಂಪತ್ ಇಷ್ಟವಾಗುತ್ತಾರೆ. 

ನಾಗಪ್ಪ.. ಮತ್ತೆ ಇಲ್ಲಿ ಖಳ.. ಆದರೆ ಆರಂಭದ ದೃಶ್ಯಗಳಲ್ಲಿ ಅರೆ ಇಷ್ಟು ಒಳ್ಳೆ ಪಾತ್ರವೇ.. ಸೂಟುಬೂಟಿನಲ್ಲಿ ಕಾಣಸಿಗುವ ಅವರು.. ಮುದ್ದಾಗಿ ಕಾಣುತ್ತಾರೆ. ಬಹುತೇಕ ಸಿನೆಮಾಗಳಲ್ಲಿ ಕಲರ್ ಕಲರ್ ಲುಂಗಿ, ಜುಬ್ಬಾ, ಬಾಯಲ್ಲಿ ಬೀದಿ, ಗಿರಿಜಾ ಮೀಸೆ, ಕೆನ್ನೆಯ ಮೇಲೊಂದು ಮಚ್ಚೆ.. ಕೆದರಿದ ಕೂದಲು.. ಹವಾಯಿ ಚಪ್ಪಲಿ ಇದು ಸಾಮಾನ್ಯವಾದ ವೇಷಭೂಷಣ.. ಆದರೆ ಈ ಚಿತ್ರದಲ್ಲಿ ಸೂಟುಬೂಟಿನಲ್ಲಿ ಕಾಣುತ್ತಾರೆ. ಜೊತೆಗೆ ಸುಂದರವಾಗಿ ಕೂಡ ಕಾಣುತ್ತಾರೆ. 

ಉಳಿದಂತೆ ಭಟ್ಟಿ ಮಹದೇವಪ್ಪ, ಎಚ್ ರಾಮಚಂದ್ರ ಶಾಸ್ತ್ರೀ, ಜೋಕರ್ ಶ್ಯಾಮ್, ಕಮೆಡಿಯನ್ ಗುಗ್ಗು, ಪಾಪಮ್ಮ ಮತ್ತಿರರು ಕತೆಯ ಓಟಕ್ಕೆ ತಕ್ಕಂತೆ ಬರುತ್ತಾರೆ. 

ಚಿತ್ರದ ವಿಶೇಷತೆ ಹಾಡುಗಳು.. ಉಪೇಂದ್ರಕುಮಾರ್ ಅವರ ಸಂಗೀತ.. 

ಜೋಕೇ ನಾನು ಬಳ್ಳಿಯ ಮಿಂಚು 
ಗುಟ್ಟೊಂದು ಹೇಳುವೆ ಪುಟಾಣಿ ಮಕ್ಕಳೇ 
ಕಣ್ಣ ರೆಪ್ಪೆ ಒಂದನೊಂದು ಮರೆವುದೆ 
ಹೋದರೆ ಹೋಗು ನನಗೇನು 
ಐಸ್ ಕ್ರೀಮ್ ಬೇಕೇ ಐಸ್ ಕ್ರೀಮ್ 

ಐದು ಹಾಡುಗಳು ಜನಪ್ರಿಯವಾಗಿವೆ.. 

ಚಿ ಉದಯಶಂಕರ್ ಮತ್ತು ಆರ್ ಎನ್ ಜಯಗೋಪಾಲ್ ರಚಿಸಿದ್ದಾರೆ

ಪಿ ಬಿ ಶ್ರೀನಿವಾಸ್, ಎಸ್ ಜಾನಕೀ, ಎಲ್ ಆರ್ ಈಶ್ವರಿ ಹಾಡಿದ್ದಾರೆ

ವೈ ಆರ್ ಸ್ವಾಮಿ ಈ ಚಿತ್ರದ ಕತೃ ಅಂದರೆ ಚಿತ್ರಕತೆ ಮತ್ತು ನಿರ್ದೇಶನ

ಆರ್ ಚಿಟ್ಟಿಬಾಬು ಛಾಯಾಗ್ರಹಣದ ಹೊಣೆ ಹೊತ್ತಿದ್ದಾರೆ 

 ಭಗವತಿ ಪ್ರೊಡಕ್ಷನ್ಸ್ ಅವರ ಲಾಂಛನದಲ್ಲಿ ತಯಾರಾದ ಈ ಚಿತ್ರದ ಕಥೆ ಕೂಡ ಅವರದ್ದೇ. 

ಮಕ್ಕಳೇ ದೇವರು ಎಂದ ದೇವರ ಮಕ್ಕಳು 1970 (ಅಣ್ಣಾವ್ರ ಚಿತ್ರ ೧೨೫/೨೦೭)

ನೂರಿಪ್ಪತ್ತಕ್ಕೂ ಹೆಚ್ಚಿನ ಚಿತ್ರಗಳಲ್ಲಿ ಅಭಿನಯಿಸಿದ ನಾಯಕ.. ಈ ರೀತಿಯ ಕಥೆಗಳನ್ನು ಪಾತ್ರವನ್ನು ಒಪ್ಪಿಕೊಳ್ಳುತ್ತಾರೆ ಅಂದರೆ ಆತ ಕಥೆಗಾರ, ನಿರ್ಮಾಪಕ, ನಿರ್ದೇಶಕರ ಮೇಲೆ ಇಟ್ಟಿರುವ ವಿಶ್ವಾಸ, ನಂಬಿಕೆ ಎಷ್ಟು ಎನ್ನುವುದು ಅರಿವಾಗುತ್ತದೆ. 

ಗಟ್ಟಿಯಾಗಿ ನೆಲೆ ನಿಂತಿರುವ ನಾಯಕ ಒಪ್ಪಿಕೊಂಡು ಮಾಡುವ ಪಾತ್ರವಲ್ಲ ಇದು ಎನ್ನುವುದು ಅನೇಕರ ಅಭಿಪ್ರಾಯ.. ಹಾಗೆ ನನ್ನದೂ ಕೂಡ.. ಆದರೆ ರಾಜಕುಮಾರ್ ಈ ಪಾತ್ರಕ್ಕೆ ವಿಭಿನ್ನ ಆಯಾಮ ನೀಡಿ.. ಆ ಪಾತ್ರವನ್ನು ಒಂದು ಸಾತ್ವಿಕತೆಯ ನೆಲೆಗಟ್ಟಿನಲ್ಲಿ ನಿಲ್ಲಿಸಿರುವುದು ಅವರ ಅಭಿನಯದ ಮೇಲಿನ ಶ್ರದ್ದೆ ಹಾಗೂ ನಂಬಿಕೆಯನ್ನು ತೋರಿಸುತ್ತದೆ. 

ಅನಾಥ, ಬಡತನ, ಕಳ್ಳತನ, ರಿಮ್ಯಾಂಡ್ ಹೋಂ, ಹೆಚ್ಚು ಓದಿನ ಅವಕಾಶವಿಲ್ಲ, ಕೂಲಿ ಕೆಲಸ, ದಾರಿಯಲ್ಲಿ ಸಿಕ್ಕಿದ ಯಾರದೋ ಮಗುವನ್ನು ಸಾಕಲು ಪಡುವ ಪಾಡು, ನಾಯಕಿ ಎದುರು ತಾನು ಕಳ್ಳತನ ಮಾಡಿ ಪೊಲೀಸ್ ತನ್ನ ಹಿಂದೆ ಬಂದಿದ್ದರೂ ತಾನು ಸಭ್ಯಸ್ತ ಅಂತ ಪೋಸು ಕೊಡುವ ಪಾತ್ರವಿದು.. ಜೈಲಿನಲ್ಲಿ ಕಳ್ಳ,ಕೊಲೆಗಾರರ ಮಧ್ಯೆ ಇದ್ದುಕೊಂಡು ತನ್ನ ತನವನ್ನು ಉಳಿಸಿಕೊಳ್ಳುವ ಪಾತ್ರವಿದು. ತನ್ನ ಗೆಳೆಯ ಕಳ್ಳತನ ಮಾಡುತ್ತಿದ್ದರೂ, ತಾನು ಅದರ ಕಡೆ ವಾಲದೆ ನ್ಯಾಯವಾಗಿ ಬೆವರು ಸುರಿಸಿ ದುಡಿಯಬೇಕು ಅದಕ್ಕೆ ಯಾವುದೇ ಚಿಕ್ಕ ಕೆಲಸವಾದರೂ ಸರಿ ಅಂತ ಕಟ್ಟಿಗೆ ಒಡೆಯುವುದು, ಮೂಟೆ ಹೊರೋದು, ಸಣ್ಣ ಸಣ್ಣ ಗೊಂಬೆಗಳನ್ನು ಬೀದಿ ಬೀದಿಯಲ್ಲಿ ಮಾರಿ ಹೊಟ್ಟೆ ತುಂಬಿಸಿಕೊಳ್ಳುವ ಪ್ರಯತ್ನ, ನಾಯಕಿಯ ಸಹಾನೂಭೂತಿ ಇದ್ದರೂ ಅದನ್ನು ದುರುಪಯೋಗ ಪಡಿಸಿಕೊಳ್ಳದೆ ನಾಯಕಿಯ ಕಣ್ಣಲ್ಲಿ ಸಭ್ಯಸ್ತನಾಗಿ ಇರುವ.. ಈ ರೀತಿಯ ಸಂಕೀರ್ಣತೆಯನ್ನು ತುಂಬಿಕೊಂಡಿರುವ ಪಾತ್ರವನ್ನು ಎಷ್ಟು ಅಚ್ಚುಕಟ್ಟಾಗಿ ತೆರೆಯ ಮೇಲೆ ತಂದಿದ್ದಾರೆ ರಾಜಕುಮಾರ್ ಅಂದರೆ.. ಇಂತಹ ಜನಪ್ರಿಯ ನಾಯಕ ಈ ರೀತಿಯ ಪಾತ್ರಗಳನ್ನು  ಮಾಡಿದಾಗ ನೋಡುವ ಮಂದಿ ತಮ್ಮನ್ನು ತಾವೇ ಆ ಪಾತ್ರದಲ್ಲಿ ಕಾಣುತ್ತಾರೆ ಎನ್ನುವಷ್ಟು ನೈಜವಾಗಿ ಮೂಡಿ ಬಂದಿದೆ. 

ತನ್ನ ಬಾಲ್ಯದ ಗೆಳೆಯನ ಆರೋಗ್ಯದ ಸಲುವಾಗಿ ಕಳ್ಳತನ ಮಾಡಿ ಜೈಲಿಗೆ ಹೋದರೂ, ನಂತರ ತನ್ನ ಸ್ನೇಹಿತ ದೊಡ್ಡ ಮನುಷ್ಯರ ಸಹಾಯದಿಂದ ಚೆನ್ನಾಗಿ ಓದಿ ವಿದೇಶ ವ್ಯಾಸಂಗ ಮಾಡಿ ಬಂದರೂ, ಆತನ ಬಳಿ ಸಹಾಯಕ್ಕೆ ಕೈ ಚಾಚದೆ ಆತನಿಗೆ ನೆರವಾಗುವ, ಆತನ ಮಗುವನ್ನು ಉಳಿಸುವ ಪಾತ್ರದಲ್ಲಿ ರಾಜಕುಮಾರ್  ಯಶಸ್ವಿಯಾಗಿದ್ದಾರೆ. 

ನಾಯಕಿಯಾಗಿ ಜಯಂತಿ ಇಷ್ಟವಾಗಲು ಕಾರಣ ಮುದ್ದಾದ ಮುಖ, ಹಳ್ಳಿಯ ಸೊಗಡಿನ  ಧೈರ್ಯವಾದ ಮಾತುಗಳು, ಮುಗ್ಧತೆ. 

ರಾಜೇಶ್ ಸುಂದರವಾಗಿ ಕಾಣುತ್ತಾರೆ.. ದೃಶ್ಯಗಳು ಕಡಿಮೆಯಿದ್ದರೂ ಅವರ ಪಾತ್ರಕ್ಕೆ ತಕ್ಕ ಪ್ರಾಮುಖ್ಯತೆ ಇದೆ. 

ನಾಯಕನ ಜೊತೆಯಲ್ಲಿ ಚಿತ್ರದ ಪೂರ್ತಿ ಕಾಣುವ ನರಸಿಂಹರಾಜು ಅವರು ಭಾವನಾತ್ಮಕ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರ ಹಾಸ್ಯ ಪಾತ್ರದ ಹಾದಿ ಒಂದು ರೀತಿಯಲ್ಲಿ ಭಾವನಾತ್ಮಕವಾಗಿ ತಿರುಗುತ್ತಿದೆ ಎಂಬ ಸುಳಿವು ಇಲ್ಲಿದೆ. 

ಉಳಿದಂತೆ ಸಂಪತ್, ಜಯಶ್ರೀ, ಇಂದಿರಾ ಜಾರ್ಜ್, ಕಲ್ಪನಾ ಮತ್ತು ಚಿತ್ರದ ಅಂತ್ಯದ ಕೆಲವು ದೃಶ್ಯಗಳಲ್ಲಿ ಕಾಣಿಸಿಕೊಳ್ಳುವ ಎಂ ಪಿ ಶಂಕರ್ ಇದ್ದಾರೆ. 

ಜಿ ಕೆ ವೆಂಕಟೇಶ್ ಅವರ ಸಂಗೀತದಲ್ಲಿ ಹಾಡುಗಳೆಲ್ಲೆವೂ ಚೆನ್ನಾಗಿದೆ. 

ಚಿ ಉದಯಶಂಕರ್ ಅವರ ಸಾಹಿತ್ಯ ಸಂಭಾಷಣೆ ಸೊಗಸಾಗಿದೆ 

ಎಸ್ ಜಾನಕೀ ಮತ್ತು ಪಿ ಬಿ ಶ್ರೀನಿವಾಸ್ ಹಾಡುಗಳಿಗೆ  ಧ್ವನಿಯಾಗಿದ್ದಾರೆ. 

ಮ ನಾ ಮೂರ್ತಿ ಅವರ ಮನಮಿಡಿಯುವ "ಮೀನಾ"ಕಾದಂಬರಿ ಆಧಾರಿತ ಚಿತ್ರವಿದು. 

ಉತ್ತಮ ಚಿತ್ರಕತೆ ಮಾಡಿ ನಿರ್ದೇಶನ ಮಾಡಿರುವುದು ವೈ ಆರ್ ಸ್ವಾಮಿ 

ಛಾಯಾಗ್ರಹಣ ಎನ್ ಜಿ ರಾವ್ 

ಭಾರತ್ ಎಂಟರ್ಪ್ರೈಸಸ್ ಲಾಂಛನದಲ್ಲಿ ಜಿ ಎನ್ ಲಕ್ಷ್ಮೀಪತಿ ನಿರ್ಮಿಸಿದ್ದಾರೆ.